“Wara tliet ġimgħat ta’ terapija fl-Ingilterra, illum imiss li mmur il-Belġju għal trattament tal-moħħ permezz ta’ frekwenzi li jservu ta’ stimolu sabiex il-moħħ ikun jista’ jaħdem aħjar.”
Dan kien il-messaġġ li ttella’ fuq Facebook fuq il-paġna taċ-ċkejkna Kate- Kate: Writing My Story, fejn ġie spejgat li dan it-trattament jieħu kważi ħames sigħat kuljum.
Ingħad li dan se jkun ta’ għajnuna kbira għal Kate, biex forsi eventwalment, tkun tista’ tibda nitkellem, anke jekk ftit biss u b’hekk iċ-ċkejkna Ferriggi tkun tista’ tikkomunika aħjar.
Il-messaġġ, intemm b’dawn il-kliem; “Nittamaw li naraw ftit progress, hekk kif din id-darba se jsiru xi testijiet biex jaraw jekk kienx hemm titjib minn mindu bdejt dan it-trattament is-sena l-oħra”.
