Minn Cristian Muscat
Matul dawn it-tlett ijiem jintlagħab ir-round tal-Aħħar 32 tal-Izibet FA Trophy fejn jidħlu jilagħbu t-timijiet tal-Kampjonat Premier u taċ-Challenge League.
Il-holders, Birkirkara, jibdew l-impenji tagħhom kontra t-team miċ-Challenge League, Attard.
Birkirkara v Attard – Birkirkara jibdew favoriti netti li jikkwalifikaw għall-Aħħar 16 meta jaffrontaw lil Attard li jilagħbu fid-diviżjoni ta’ livell inqas u jinsabu fl-14-il post (minn 16-il team) u fiż-żona tar-relegazzjoni.
Il-Karkariżi mistennija jagħtu d-debutt lill-attakkant, Andrea Zammit, li proprju fil-jiem li għaddew ngħaqad magħhom wara avventura qasira ma’ Messina.
Floriana v Naxxar L. – Din il-partita hija l-unika waħda bejn timijiet tal-Premier.
Il-ko-leaders, Floriana, jilagħbu kontra Naxxar Lions li qed jitqiesu bħala t-team rivelazzjoni tal-istaġun.
Wara bidu ferm ħażin, in-Naxxarin issa jinsabu fis-sitt post tal-klassifika.
Aktar minn hekk, iż-żewġ timijiet spiċċaw fi draw ta’ 1-1, fl-ewwel round tal-kampjonat.
Din se tkun is-sitt darba li l-Greens u l-Lions se jiltaqgħu f’din il-kompetizzoni fejn fil-ħamsa preċedenti Floriana rebħu tlieta filwaqt li Naxxar rebħu tnejn … bl-ewwel konfront ikun kważi 76 sena ilu meta, fid-9 ta’ Mejju, 1948, il-Furjaniżi kienu għelbu lin-Naxxar fil- kwarti-finali bl-iskor ta’ 6-0.
Mosta v Pietá H. – Mosta jaffrontaw lit-team miċ- Challenge League, Pietá Hotspurs, li jinsabu fit-tielet post tal-klassifika u sfidanti denji għall-promozzjoni fl-ogħla diviżjoni wara li sfaw relegati fl-istaġun li għadda.
Min-naħa ta’ Mosta ilhom ma jirbħu għal dawn l-aħħar seba’ partiti li f’sitta minnhom naqsu li jsibu x-xibka avversarja.
Fl-ewwel round, il-Hotspurs għelbu lil Senglea Athletic 3-2 bil-penalties wara li l-konfront intemm fi draw ta’ 2-2.
Hamrun S. v Lija A. – Din hija logħba li Hamrun Spartans għandhom jibdew favoriti netti hekk kif dan il-konfront ilaqqa’ l-ko-leaders tal-Premier kontra Lija Athletic li jinsabu fis-seba’ post taċ-Challenge League.
Din hija t-tieni darba li dawn iż-żewġ timijiet se jiltaqgħu f’din il-kompetizzjoni.
Fir-round preċedenti, Lija eliminaw lil Kirkop United bl-iskor ta’ 2-1.
Marsaxlokk v Zejtun C. – Marsaxlokk jiffaċċjaw lil Zejtun Corinthians fid-derby tax-Xlokk ta’ Malta.
Din se tkun ir-raba’ darba li dawn iż-żewġ timijiet se jilagħbu kontra xulxin f’din il-kompetizzjoni fejn it-team miċ-hallenge League, Zejtun Corinthians, rebħu tnejn minnhom.
Iżda l-finalisti tal-istaġun li għadda, Marsaxlokk, huma favoriti netti li jibbilanċjaw il-miżien bejniethom.
Fl-ewwel round, iż-Żwieten għelbu lil Kercem Ajax 3-2 wara l-ħin barrani.
Balzan v Zurrieq– Balzan, li jinsabu fit-tmien post tal-Premier jilagħbu kontra Zurrieq li jinsabu fil-ħames post taċ-Challenge League u b’ċans tajjeb li jiksbu l-promozzjoni wara nuqqas ta’ 25 sena.
Din se tkun l-ewwel darba li dawn iż-żewġ timijiet se jiltaqgħu f’din il-kompetizzjoni.
Interessanti huwa l-fatt ukoll li rebħuha darba kull wieħed … Balzan fl-2018/19 u Zurrieq fl-1984/85.
Hibernians v Qala S. – Bla dubju, Hibernians jibdew favoriti li jgħaddu għar-round li jmiss meta jilagħbu kontra t-team Għawdxi ta’ Qala Saints li jinsab fit-fit-tieni post tal-Ewwel Diviżjoni.
Din se tkun l-ewwel sfida bejn dawn iż-żewġ timijiet f’din il-kompetizzjoni … u filwaqt li din se tkun il-203 partita tal-Pawlisti, din se tkun biss it-13-il dehra tas-Saints.
Biex għaddew għal dan ir-round, Qala għelbu lil Melita bl-iskor ta’ 7-5 wara l-ħin barrani.
Valletta v Għajnsielem – Bil-pożizzjoni diżappuntanti fil-klassifika tal-Premier, tant li jinsabu fil-periferija tar-relegazzjoni, Valletta jimmiraw li jirbħu l-FA Trophy li tista’ ssalvalhom l-istaġun u fl-istess waqt jaqtgħu l-passaġġ għall- kompetizzjoni tal-UEFA Conference League.
Il-partita kontra Għajnsielem, li jinsabu fis-sitt post (minn tmien timijiet) tal-Ewwel Diviżjoni Għawdxija, hija l-ewwel ostaklu li jridu jissuperaw.
Il-Lilywhites jibdew favoriti iżda jridu juru rispett lejn l-avversarji tagħhom.
Sliema W. v Marsaskala – Sliema Wanderers jibdew favoriti netti meta jaffrontaw lil Marsaskala li jinsabu fit-tieni post tal-Amateur League B.
Il-Wanderers jinsabu erba’ punti biss taħt il-leaders tal-Premier League u għaldaqstant l-Iskalin iridu jkunu fl-aqwa forma tagħhom biex joffri sfida denja lit-team li rebaħ din il-kompetizzjoni 26 darba!
