Pajjiżna lbieraħ iċċelebra Jum il-Ħelsien, jum li fih ġie ssiġillat kapitlu importanti fl-istorja ta’ Malta. Din hija okkażjoni li fiha nfakkru l-għeluq tal-bażi militari Ingliża u l-ħelsien. Fil-31 ta’ Marzu, 1979 kien telaq l-aħħar bastiment Ingliż minn pajjiżna u Malta ma baqgħetx tintuża bħala bażi militari Ingliża.
Il-programm uffiċjali tal-attivitajiet ta’ Jum il-Ħelsien kien imħejji minn Festivals Malta permezz tal-Kumitat Festi Nazzjonali fejn fid-9.30 a.m., beda marċ mill-Banda tal-Forzi Armati ta’ Malta minn Pjazza Pawlino Vassallo f’Bormla u għadda minn Triq Dom Mintoff għal Triq San Lawrenz il-Birgu, sal-Monument tal-Ħelsien.
Il-Banda tal-Forzi Armati ta’ Malta flimkien mal-Gwardja tal-Unur laqgħu lill-ogħla awtoritajiet tal-pajjiż fosthom il-President ta’ Malta Myriam Spiteri Debono u l-Prim Ministru Robert Abela. Iċ-ċerimonja fuq l-għolja tal-Ħelsien laħqet il-qofol tagħha fl-10.00 a.m. fejn mal-wasla tal-President ingħata salut nazzjonali.
Wara l-ogħla awtoritajiet flimkien telgħu fuq l-għolja tal-Ħelsien bil-Banda tal-Forzi Armati ta’ Malta tesegwixxi l-Innu tal-Ħelsien. Wara ndaqqet il-fanfarra u tpoġġew il-fjuri fuq l-istess monument. Iċ-ċerimonja ġiet fi tmiemha bid-daqq tal-Innu Nazzjonali.
Illum it-Tlieta 1 ta’ April 2025 f’nofsinhar se ssir parata mill-Banda tal-Forzi Armati ta’ Malta fi Pjazza San Ġorġ, il-Belt Valletta. F’din il-wirja, il-Banda tal-Forzi Armati ta’ Malta mmexxija mill-Maġġur Jonathan Borg se tesegwixxi numru ta’ kompożizzjonijiet lokali flimkien ma’ numru ta’ marċi li matulhom isiru diversi formazzjonijiet mill-istess membri tal-Banda tal-Forzi Armati ta’ Malta. Lejn l-aħħar tal-parata, il-banda tesegwixxi ‘Lil Malta f’Jum il-Ħelsien’ ta’ Mikis Theodorakis