Raġel ta’ 56 sena ġie kkundannat sentejn ħabs sospiżi għal tliet snin wara li nstab ħati, fuq ammissjoni tiegħu stess, li ffalsifika diversi dokumenti li permezz tagħhom ħa kważi €20,000 f’pagamenti.
Huwa ġie ordnat ukoll iħallas l-ammont pendenti tas-somma li kien irċieva f’benefiċċji.
Mario Demicoli, minn Ħal Qormi u residenti l-Pietà, ġie mixli li bejn Jannar 2020 u Ġunju 2023 iffalsifika għadd ta’ dokumenti li permezz tagħhom ħa iktar minn €19,000 f’pagamenti ta’ benefiċċji soċjali. Huwa wieġeb ħati tal-akkużi miġjuba kontrih.
Il-Qorti semgħet lil Martin Buhagiar, Assistent Direttur tad-Dipartiment tas-Sigurtà Soċjali, li ddikjara illi l-imputat ħa s-somma ta’ €19,281.50 b’qerq għad-detriment tad-Dipartiment tas-Sigurtà Soċjali. L-imputat qal li huwa jinsab dispost iħallas l-ammont kollu permezz ta’ ripagamenti ta’ €500 fix-xahar.
Fis-seduta tat-12 t’Ottubru, l-imputat qal li kien intlaħaq ftehim formali u li min-naħa tiegħu diġà għamel l-ewwel pagament ta’ €500 u li għalhekk il-bilanċ dovut hu ta’ €18,781.50.
Meta ġiet biex tagħti s-sentenza, il-Qorti tal-Maġistrati, ippreseduta mill-Maġistrat Rachel Montebello, ikkunsidrat fost l-oħrajn il-gravità tar-reati li qiegħed jinstab ħati tagħhom l-imputat u l-ammont sostanzjali li nkiseb mill-imputat b’riżultat tal-kommissjoni ta’ dawn ir-reati.
Il-Qorti kkunsidrat ukoll il-fedina penali tal-imputat mhux daqstant nadifa kif ukoll l-ammissjoni bikrija tiegħu. Qieset ukoll il-fatt li ntlaħaq ftehim formali bejn il-partijiet dwar il-ħlas tal-ammont dovut u li diġà bdew isiru r-ripagamenti skont kif maqbul fl-istess ftehim.
Għalhekk, huwa ngħata sentenza sospiża u ġie ordnat iħallas is-somma ta’ €18,781.50 lid-Dipartiment tas-Sigurtà Soċjali.
Il-Prosekuzzjoni tmexxiet mill-Ispetturi Wayne Rodney Borg u Andy Rotin.
