Gabriella Huhn Privitera tingħata sentejn ħabs sospiżi għal erba’ snin wara li ammettiet li kkawżat il-mewt ta’ Joseph Camilleri b’negliġenza. Il-Qorti tilliberaha mill-akkuża ta’ sewqan perikoluż u tikkonkludi li l-pożizzjoni tal-karrettun fit-triq ikkontribwiet għall-inċident.
Sewwieqa li fl-2022 kienet involuta f’inċident fatali ma’ karrettun miġbud miż-żwiemel fir-Rabat ġiet ikkundannata sentejn ħabs sospiżi għal erba’ snin, wara li ammettiet li kkawżat il-mewt ta’ raġel b’negliġenza. Gabriella Huhn Privitera nstabet responsabbli għall-omiċidju involontarju ta’ Joseph Camilleri, li tilef ħajtu wara li l-vettura Skoda Yeti li kienet qed issuq ħabtet fuq wara ta’ karrettun fil-11 ta’ Marzu 2022.
Fl-istess inċident weġġa’ Luciano Attard, li kien fuq il-karrettun flimkien ma’ Camilleri. Madankollu, il-Maġistrat Nadine Sant Lia lliberat lis-sewwieqa minn tliet akkużi oħra, fosthom dik ta’ sewqan traskurat jew perikoluż, wara li kkonkludiet li ċ-ċirkostanzi tal-inċident ma kinux jilħqu l-livell ta’ sewqan perikoluż meħtieġ mil-liġi.
Vann kbir kien qed jgħattilha l-vista tat-triq
Mill-provi rriżulta li Privitera kienet qed issuq lejn ir-Rabat meta sabet ruħha wara vann kbir li kien qed jillimitalha l-viżibbiltà ta’ dak li kien hemm quddiemha. F’ħin minnhom, il-vann qabeż għal fuq in-naħa opposta tat-triq biex jaqbeż karrettun li kien miexi bil-mod. Kien f’dak il-mument li s-sewwieqa lemħet il-karrettun quddiemha. Hija spjegat li ppruvat twaqqaf il-vettura u timmanuvra biex tevita l-ħabta, iżda ma rnexxilhiex.
L-impatt kien qawwi biżżejjed biex iż-żewġt irġiel li kienu fuq il-karrettun spiċċaw mitfugħa minnu, filwaqt li ż-żewġ żwiemel inħelsu u ħarbu minn fuq il-post. Camilleri, li kien qed iżomm ir-riedni, intlaqat minn wara u ħabat rasu mal-vettura tas-sewwieqa. Minkejja t-tentattivi biex jingħata l-għajnuna medika, huwa ġie ċċertifikat mejjet fl-Isptar Mater Dei.
Il-vittma ġarrab ġrieħi serji fis-sinsla
L-espert medikolegali Mario Scerri spjega li Camilleri kien sofra ġrieħi fis-sinsla kompatibbli ma’ trawma qawwija, li setgħet seħħet meta waqa’ minn fuq il-karrettun. Min-naħa tiegħu, Attard ġarrab ġrieħi f’rasu u f’subgħajh, tbenġil estensiv f’dahru u brix f’diversi partijiet ta’ ġismu. Huwa xehed li wara l-inċident baqa’ jesperjenza tnemnim fin-naħa tax-xellug ta’ ġismu. Madankollu, l-espert mediku ma sabx li l-ġrieħi tiegħu kienu mistennija jħallu konsegwenzi permanenti.
Uffiċjali tal-Pulizija li marru fuq il-post iddeskrivew lis-sewwieqa bħala persuna fi stat ta’ xokk, li kienet qed tibki u tinsab f’paniku wara dak li kien ġara.
Kienet qed issuq b’madwar 35 kilometru fis-siegħa
L-espert tekniku Mario Buttigieg ikkalkula li fil-ħin tal-inċident il-vettura kienet qed tinstaq b’veloċità ta’ madwar 35 kilometru fis-siegħa. Il-limitu tal-veloċità f’dik it-triq kien ta’ 60 kilometru fis-siegħa. Għalkemm inizjalment il-Pulizija kienet issuspettat li s-sewwieqa setgħet kienet qed tuża l-mowbajl waqt is-sewqan, l-investigazzjonijiet sussegwenti eskludew din il-possibbiltà. Lanqas ma nstabet evidenza li kienet taħt l-influwenza tal-alkoħol jew ta’ sustanzi oħra.
Il-karrettun kien qed jieħu aktar spazju fit-triq
Aspett importanti li kkunsidrat il-Qorti kien il-mod kif il-karrettun kien qed jintuża u l-pożizzjoni tiegħu fit-triq. Camilleri kien qed imexxi l-karrettun, filwaqt li Attard kien qed iżomm żiemel ieħor b’ħabel maġenbu. Skont il-Maġistrat, din l-arranġament wassal biex il-karrettun ikun aktar lejn iċ-ċentru tat-triq, minflok viċin il-ħajt tal-ġenb. Dan naqqas l-ispazju disponibbli għall-vetturi li kienu qed jippruvaw jaqbżuh.
Il-Qorti osservat li r-riskju ta’ ħabta kien ikun ferm iżgħar kieku fuq il-karrettun kien hemm persuna waħda biss u dan seta’ jinżamm aktar lejn il-ġenb tat-triq. Għaldaqstant, il-Maġistrat ikkonkludiet li l-pożizzjoni tal-karrettun kienet ikkontribwiet b’mod sinifikanti għall-periklu li wassal għall-inċident. Madankollu, enfasizzat li negliġenza minn persuna oħra li tkun qed tuża t-triq ma teħlisx awtomatikament lil sewwieq mir-responsabbiltà kriminali tiegħu.
Fil-kawża ħareġ ukoll, permezz ta’ rappreżentant ta’ Transport Malta, li Camilleri kellu permess biex jirkeb żiemel, iżda ma kellux l-awtorizzazzjoni separata meħtieġa biex isuq karrettun miġbud miż-żwiemel fit-toroq pubbliċi.
Il-Qorti ma ssibx sewqan perikoluż
Meta eżaminat l-akkuża ta’ sewqan perikoluż, il-Maġistrat qieset li s-sewwieqa kienet sabet ruħha quddiem sitwazzjoni mhux mistennija wara li l-vann ta’ quddiemha biddel il-karreġġjata. Il-Qorti kkonkludiet li r-reazzjoni tagħha kienet ikkaratterizzata minn mument ta’ indeċiżjoni, aktar milli minn aġir li seta’ jiġi kklassifikat bħala sewqan perikoluż jew imprudenti skont il-liġi.
Il-fatt li kienet qed issuq taħt il-limitu tal-veloċità u li ppruvat tevita l-impatt kien fost iċ-ċirkostanzi kkunsidrati. Privitera ġiet illiberata wkoll mill-akkuża li kkawżat ġrieħi gravi lil Attard. Il-Qorti qieset li, għalkemm huwa kien weġġa’ fl-inċident, il-provi mediċi ma kinux jistabbilixxu li l-ġrieħi tiegħu kienu ta’ natura gravi fis-sens tal-liġi.
Barra minn hekk, il-Qorti lliberatha mill-akkuża ta’ ħsara involontarja fuq proprjetà, minħabba li l-prosekuzzjoni ma kinitx ippruvat b’mod adegwat il-proprjetà tal-karrettun u l-valur tal-ħsarat.
Sentejn ħabs sospiżi u sena skwalifika mis-sewqan
Meta waslet biex tagħti l-piena, il-Maġistrat Sant Lia qieset is-serjetà tal-fatt li persuna kienet tilfet ħajjitha, kif ukoll iċ-ċirkostanzi partikolari tal-inċident. Hija kkunsidrat ukoll il-fedina penali relattivament nadifa tas-sewwieqa u l-fatt li ammettiet l-akkuża tal-omiċidju involontarju, għalkemm din l-ammissjoni saret fi stadju avvanzat tal-proċeduri.
Il-Qorti ddeċidiet li piena ta’ priġunerija kienet ġustifikata, iżda li kien hemm raġunijiet biżżejjed biex l-eżekuzzjoni tagħha tiġi sospiża. Għaldaqstant, Privitera ġiet ikkundannata sentejn ħabs sospiżi għal erba’ snin. Hija ġiet ukoll skwalifikata milli ssuq għal sena u ordnata tħallas €6,186.45 fi spejjeż tal-esperti tal-Qorti fi żmien sentejn.
Il-prosekuzzjoni tmexxiet mill-Ispettur Godwin Scerri, filwaqt li l-Avukat Gianella De Marco rrappreżentat lill-akkużata.