Dalgħodu, għall-ħabta tas-7.15am, il-Pulizija intalbet tassisti f’inċident tat- traffiku fi Triq Tul il-Kosta, in-Naxxar.
Il-Pulizija marret minnufih fuq il-post u minn stħarriġ preliminari rriżulta li Subaru Impreza, misjuqa minn raġel ta’ 41 sena residenti Ħal Għaxaq, ħabtet ma’ ħajt bil-vettura tieqaf f’nofs il-karreġjati.
Minħabba f’hekk, numru ta’ vetturi waqfu għax ma setgħux jgħaddu, bil-konsegwenza li raġel ta’ 36 sena li kien qed isuq mutur Suzuki prova jevitahom, iżda tilef il-kontroll u ħabat mal-crash barriers u ġarrab xi ġrieħi.
Fl-istess ħin ukoll, u fl-istess post, seħħet chain collission bejn ħames vetturi – vann Isuzu, Mazda 2, Toyota Passo, Toyota Vitz u Porsche – fejn ix-xufier tal-Vitz, raġel ta’ 29 sena residenti San Pawl il-Baħar sofra wkoll xi ġrieħi.
Tim mediku assista minnufih fuq il-post u bix-xufier tal-mutur u tal-Vitz ttieħdu l-isptar b’ambulanza, fejn aktar tard ġew iċċertifikati bi ġrieħi gravi. Ir-raġel ta’ 41 sena ma weġġax.
L-investigazzjonijiet tal-Pulizija b’rabta ma’ dawn l-inċidenti għadhom għaddejjin.
