Il-bejgħ tal-club ta’ Chelsea ġie approvat mill-FA Ingliża kif ukoll mill-Gvern Ingliż bil-konsegwenza li fis-sigħat li ġejjin se toħroġ il-konferma li l-Pensioners għandhom sidien ġodda.
Konsorzju mmexxi minn Boehly, is-sid ta’ Los Angeles Dodgers tal-baseball, kien diġà laħaq ftehim ta’ £4.25 biljuni biex jixtri l-club tal-Premier League mingħand is-sid Roman Abramovich, fis-7 ta’ Mejju li għadda.
Stqarrija tal-Premier League kienet tgħid: “Il-Bord tal-Premier League illum approva x-xiri propost ta’ Chelsea Football Club mill-Konsorzju Todd Boehly/Clearlake.
“Dan ix-xiri jibqa’ suġġett għall-Gvern (Brittaniku) li joħroġ il-liċenzja tal-bejgħ meħtieġa u t-tlestija sodisfaċenti tal-istadji finali tat-tranżazzjoni.”
L-uffiċjali jixtiequ li sal-Erbgħa jkun kollox finalizzat biex ikunu jistgħu jegħlbu l-iskadenzi kollha tar-reġistrazzjoni għall-kompetizzjonijiet tal-istaġun li ġej.
Min-naħa ta’ sors tal-gvern qal: “Issa verament nemmnu li l-liċenzji meħtieġa se jkunu maħruġa.”
